作田人

潮州九縣，縣縣有”古”，澄海縣，人唔㩼，“古”𠁞少。我學，你聽。

許一日個暝昏，虼蚤叔駛牛好轉到厝內，把牛縛在外埕角塗下許枝牛杚了，摜一[⿱艹撮]灱個稻稿草[⿱𥫗㧕]去牛食後，唔知是乏了，抑是肚內有乜事，一句話囉無，倒落竹伸椅就食起煙筒來：煙霧一球一球飛起，煙味一陣一陣散開.

虼蚤叔連續𠮨了三四口煙後，開嘴叫伊大走仔：「大妹啊，你睇一下月粉牌，今日是𫢗時？」

大妹俗伊阿父呾：「今日是中華民國三十一年三月初七日，穀雨。」

「什乜國后？」虼蚤叔一聽就奪火：「抑是皇帝個𡟓，就叫太后，什乜”國后”？」

呾著就坐起來大聲掰喉呾：「穀一雨一糊糊塗塗，清明穀雨，連只句話囉唔𧧸聽過？你今年十六歲，𠁞細了。照俺潮汕人呾個：姿娘仔𠁞念二十四個節氣孬嫁人。作田人，唔𧧸節氣作乜田？」呾著，虼蚤嬸同灶下跿出來，伊呾：「我也唔𧧸二十四個節氣，做呢也嫁到只塊來？」

虼蚤叔一下就轉換了“戰場”，呾：「好，我就呾你聽。許𫢗時，我窮是窮，三頓還有兩碗糜食；你許內破船破網掠無魚，窮到著火燒，連飲囉無好呴。是你𡟓三匏涎四匏鼻來叫我收留你……」

虼蚤嬸拍斷伊翁個話，“哎嗬”一聲。

「娘會有貪穿。哎嗬乜個？唔是嗎？」虼蛋叔反問。

「擔柑賣了一剩副柑擔！」虼蚤嬸佮掠著機會平樣，呾：「許一年我正十六歲，你三十欲到還無𡚸無狗。我𡟓一是可憐你，二是睇你大隻[⿱力足]，會作田，硬叫我嫁乞你個。」

伊歇一口氣後追問：「我無枉屈你，是唔是啊？」

伊又等了一下，見伊翁無回話，又倒落竹伸椅食起煙來，又呾：「啞了？」接著一字一頓呾：「顛一倒一呾，敢[⿺是大]就贏！」

「好囉好囉，」大妹出來喊：「日晏了，食暝昏了。」

許一瞑，只家人相安無事，佮六月天個浮雲雨平樣，一陣就過去；也俗在桶𰉗內洗盤洗碗平樣，相𢿧相撞是常事。