七夫人宮

無一下，兩人來到泰祖祠堂前。天壽姆指著正手畔，呾：「俺鄉里只個”泰祖祠”，好㩼年無擺燈，俺先去吳厝村七夫人宮，許塊同前年年擺燈。」行了四五十跿，跿入吳厝村村門，是一條又平又白個紅毛塗路，路個正手畔是兩三落兩層樓個大厝，大厝對面是一條大溪，大溪墘上是同西到東一落續一落個大厝，也攏總是用紅毛塗起個，只坪大厝個後牆攏總浸在溪水內。天壽姆指著倒手畔許幅牆呾：「許內是個大花園。」楊梅問：「是底人個花園？」天壽姆又指著一落有一個危危、尖尖個塔樓，呾：「花園是只個㩼堂個。只個”番仔樓”是法蘭西人起個”天主㩼堂”。」楊梅問：「伶時起個？」天壽姆呾：「我七歲許年起個。」楊梅屈指一算，呾：「阿姆相龍，今年五十四。今年是民國卅五年，許陣你七歲，吓門是清朝

時期起個了。

天壽姆呾：「是，光緒廿五年。楊梅呾：「已經四十七年了，還照好。番仔鬼起個厝就是比俺個有，耐竚。」正呾著，就聽見有人在唱歌：韓江兩岸是名城，街頭巷尾盡歌聲。元宵佳節人同樂，百屏花燈唱恁聽。活燈睇完睇紗燈，頭屏董卓鳳儀亭；貂嬋共伊囉戲耍，呂布氣到手搥胸。二屏秦瓊倒銅旗，三屏李素射金錢。四屏梨花囉𠮨毒，五屏郭華賣胭脂。六屏點將楊延昭，七屏張飛戰馬超。八屏孔明空城計，九屏李旦探鳳嬌。十屏關爺過五關，十一昭君去和番。楊梅企湉，天壽姆也綴伊企湉。楊梅個頭欹欹聽一下了，問：「阿姆啊，佮底塊人囉唱歌？」天壽姆呾：「佮是人在開”機器曲”，唔是真人唱個。」楊梅問：「只條《百屏燈》，機器曲比俺嘴唱個好聽敍。」天壽姆呾：「你聽見伊唱”活燈睇完睇紗燈”麼？」楊梅呾：「聽見。」天壽姆呾：「禾行，去七夫人宮內睇活燈佮紗燈。」斡落正手畔，燈火光光個七夫人宮就在目前。踏入宮門，雙畔離地五六尺危個燈棚上，擺著一齣一齣個”丁”，有塗燈，有紗燈，一屏燈貼一個

戲出名。

楊梅頭睇頭呾乞天壽姆聽：「《趙雲救阿斗》《韓文公凍雪》，《梅良玉思釵》，《崔鶯鶯聽

琴》，《三休樊梨花》，

《雪梅㩼商輅》，《掃紗窗》，《秦檜風波亭》，《蘇秦假不第》，《霸王別姬》，《三打祝家莊》，《楊令婆掛帥》，《吳王娶西施》，《海瑞拍嚴嵩》，《孟姜女哭倒長城》，《郭子儀拜壽》…」天壽姆頭聽頭”嗯、嗯、嗯”。伊呾：「者個就叫做”十五瞑睇燈—齣齣唔平樣。只撮燈屏，我攏總知伊呾個乜事。者個，戲棚頂做過。歌冊內唱過。」楊梅呾：「俺潮州姿娘，讀書個人少，吓個𧧸個古好，就是睇戲佮聽歌學會、學勢個。阿姆啊，你覓三四本歌冊乞我睇，好咩？」

「好，好。阿梅啊，你睇只燈棚下滸兩枝在揮圈個燈。」楊梅企到近近去睇了，問：「阿姆，者個叫也活燈？」天壽姆呾：「者個叫做”走馬燈”。阿梅，你睇你頭頂只齣燈。」楊梅企湉睇上睇下，睇左睇右，睇前睇後，想睇明白只齣燈上許撮安仔個骹手做呢會顛動？天壽姆知伊睇唔出機關，就呾：「者個正叫做”活丁”。只齣是《水淹金山寺》。只撮蝦兵蟹將擎刀擎槍囉相创，法海和尚佮青蛇白蛇拍來拍去，是師父用大時辰鐘個機器弓個顛動個，機器放在許下個暗箱內，人睇唔見。」楊梅呾：「師父是勢人！會想心事個人。」天壽姆呾：「阿梅啊，俺禾去別塊睇。