提親情

天壽姆問伊走仔：「阿馬今年十九歲了，你想𡥘新婦？」梅香答答頭。

「也好」天壽姆呾：「人呾”先發財唔如先生仔”，俺只塊，十七八歲𡥘𡚸個都有。新婦𡥘入內，內內外外個工課有加個人相輔，你翁媎就閒㩼。梅香頭聽頭答頭。

伊𡟓呾：「我睇俺厝邊阿鏡清伊走仔𠁞孬？伊讀過五六年老書，人又雅又斯文。」

梅香問：「你是呾許王厝阿楊梅？」

伊𡟓“嗯”了一聲，呾：「伊家已睇著也佮目。」

梅香聽出只句話生骹生骹，急問：「阿楊梅食照大還未曾去過阮大田村，伊做呢見過阿馬？」

伊𡟓呾：「舊年，溪東舥龍船比賽，大田個龍船隊也來。俺個厝比較闊，阿狗（伊是比賽個頭人）呾在俺只大外埕內煮食請人。鏡清叫伊走仔來相輔洗菜截菜。許一日晝，俺阿馬在溪內洗浴好，穿個褲𰉗、摜伊副衫褲入來，楊梅正好坐在門口洗碗洗箸，伊兩人見了都笑笑。」

梅香聽著，個頭答到佮雞食粟平樣，呾：「原來是照生。」

伊問：「你問過阿楊梅？伊做呢呾？」

「楊梅唔𧧸阿馬，」天壽姆呾，「日畫後，比賽個攏總轉去，許瞑昏，我佮阿楊梅呾：你在門口見著許個後生仔是我外孫阿馬，楊梅好歡喜，伊呾：吓我著叫伊做阿兄囉！隔日，伊還來問者問吓，我就知伊對阿馬佮目了。伊還問我：阿馬兄到𫢗時又來？」

「好是好，」梅香呾，「不過，阿楊梅個身材𠹛呿薄。人呾雅𡚸損兒婿。雅唔雅無相干，又唔是欲請紗燈去⿱安立。伊阿父哩睇著溪西村阿歪有氣有力會作田好。」

天壽姆問：「是李欽錫伊走仔？」

「嗯！」梅香答頭。

伊𡟓呾：「阿歪是溪西出名個㜁𡚸牯——大隻趸。伊阿父著瘕痀抽病，無力作工，伊𡟓哩是纏骹個，也無變落田落海，一家內內外外，囉是阿歪在作牛作馬，贏過好㩼大夫仔。只是無文無墨，又蘙鬋、又淤恣。」

梅香呾：「𧧸字掠無蟛蜞。文，孬做柴火烆，墨，孬做米粟食。古來無文無墨個，人人也活到老老；讀了一肚詩書個，倒是活活餓死去。作田人，唔𧧸聽過因為無文無墨餓死去。」

天壽姆聽到只塊，無話呾了，就呾：「也是。」就收煞。

兩個孥仔——阿狗兄妹坷到一身佮塗安仔平樣，歡喜到乜個就走入來。天壽姆母女一見又好笑又好氣，齊齊問：「恁去底塊來啊？」

「阮佮阿舅去掠沙蟒！」

「好好好好，」天壽姆呾：「禾猛猛去洗手洗面了食飯。」

食飯後，阿狗拖著伊娘個手，到外埕角去，細細聲問：「阿姈啊，阿舅會佮阮呾話，阮叫伊，佮伊呾話，伊哩唔開嘴，唔知做呢？」

伊𡟓“噢”了一聲，呾：「阿舅細個時候，乞日本仔拍到耳聾，乜個囉聽唔見了。 」

阿狗一下就跳起來，大聲喊：「等我大了，我去刣死日本仔！」

伊𡟓呾：「你勥死——孬散呾！」